محمد الشيخ: عيني على تدريب منتخب مصر ولو حصل هحقق بطولة.. وإمام عاشور محدش عارف يتعامل معاه
تاريخ النشر:
تحدث محمد الشيخ المدير الفني السابق لفريق وادي دجلة عن كواليس رحيله عن الغزلان، كاشفًا عن رأيه في علي ماهر وحسام حسن، بجانب طموحاته خلال الفترة المقبلة، مؤكدًا أن عينه على أن يكون مديرًا فنيًا لمنتخب مصر الأول لكرة القدم مستقبلًا.
البنك الأهلي يكشف حقيقة مفاوضات محمد الشيخ لخلافة أيمن الرمادي
وادي دجلة يعلن رحيل محمد الشيخ عن تدريب الفريق.. وشبيطة خلفًا له
تصريحات محمد الشيخ
وقال محمد الشيخ في تصريحات تليفزيونية: بيتقال إني معنديش خبرات.. فـ هل لازم أكون كبير في السن عشان يبقا عندي خبرات؟ مش عارف بصراحة بتتقاس ازاي!.
وأضاف: دجلة صاحب فضل عليّا وأدين لهم بالجِميل، ودجلة عنده استراتيجية وخطة واضحة.. وفي أوقات ببقا أنا كـ مدرب مش بقدر أنفذ استراتيجية معينة فـ بيبقا عندي استراتيجية تانية ولكن الإدارة مش متقبلاها فـ اتفقنا إني مش هقدر أعمل دا في النادي رغم إني مقتنع إن الاستراتيجية صح، ولكن مش أنا المدير الفني اللي أقدر أنفذ تلك الاستراتيجية، ومفيش اختلاف بيني وبين إدارة دجلة، ورحيلي كان بسبب الاختلاف بين رؤيتي واستراتيحية النادي.
وأشار محمد الشيخ في تصريحاته: مازلت أطلب الاستئذان من دجلة رغم رحيلي للحديث في وسائل الإعلام عن النادي، وتعلمت على يد مدرسة بنفيكا البرتغالي التدريبية من خلال اتفاقية تعاون كانت قائمة مع نادي النجوم، ومقتنع إني مينفعش أغيّر الخطة في المباراة من غير ما أمرنهم.
وأكد: المباريات الكبيرة أمام الأهلي والزمالك وبيراميدز اللاعب بيبقا مهتم ومركّز مليون المية، أما المباريات التي أمام المنافسين مثلًا المتأخرين في الترتيب باخد حذري لأني بخاف من ثقة اللاعبين الزايدة.
وعن علي ماهر، زاد محمد الشيخ في تصريحاته قائلًا: كنت بتمنى إن علي ماهر يكون المدير الفني لمنتخب مصر لأني عملت معه في نادي النجوم وكنا بنتمرن جمب بعض، واتقابلنا أكثر من مرة وشوفت كم التفاصيل اللي بيهتم بيها، ومدرب مُتعِب ومش سهل، وكنت بقول لو هو راح منتخب مصر بالتفاصيل بتاعته وكواليتي لاعبي الفراعنة هيكسّر الدنيا وإن شاء الله هنشوف منتخب قوي جدًا تحت قيادته، ولو كام فرصة من اللي ضاعوا جبناهم أمام مالاوي في المباراة الثانية كنا هنشيد بـ علي ماهر، وهو دا تاني ماتش ومينفعش أحاسبه أو أعاتبه في تلك المباراتين، واللي هيحصل وهنشوفه بعينينا في الملعب من الخطة هيبقا من شغله في التمرين مش بالصدفة.
وعن فترة حسام حسن، أفاد الشيخ: تجربة حسام حسن مع منتخب مصر بالنتائج فـ محصلتش قبل كدة في تاريخ الفراعنة بـ كأس العالم، وطلّع لاعيبة كتير للنور، وكنا أقوياء في المونديال، وأي منتخب يخاف مننا، وعمل حالة قوية جدًا وادانا أمل إننا ننافس المنتخبات دي، وزعلت بسبب طريقة رحيله وكنت أتمنى أن يتم تكريمه على ما فعله وقدمه لمنتخب مصر.
وشدّد: شرف كبير ليّا إن اسمي يرتبط بتدريب منتخب مصر، ولدي يقين وقناعة بنفسي إن دا هيحصل ممكن مع المنتخب الأول كمان وأحقق بطولة، وعيني على إني أكون المدير الفني لـ منتخب مصر.
واستمر: عندي مشروع.. ولو روحت لإدارة نادِ إني هتناقش في مشروع مع النادي مش الفلوس تمامًا وهنحط أساس وأنا الأساس دا جاهز عندي ورايح عارف مميزات وعيوب اللاعب الفُلاني في كل نادِ ورايح أحترمهم وأديهم حقهم، واللي حصل في وادي دجلة مش وليد صدفة، النجاح في التأهل للدوري الممتاز، ثم ما فعلناه في الدوري الممتاز ليس بالصدفة بل بالجهد والعمل.
وواصل محمد الشيخ تصريحاته: شرف لي تدريب الأهلي أو الزمالك أو بيراميدز وأتمنى أن يحدث بكل تأكيد، وموكوينا مدرب السماوي أفضل أداء لمدير فني حتى الآن، والأهلي أقرب للفوز في مباراة بيراميدز بسبب شخصية اللاعبين والجمهور خلفهم، والزمالك من مصلحته أن المباراة تخرج بالتعادل.
وعن إمام عاشور، ذكر الشيخ: إمام عاشور نفسيًا مش أحسن حاجة ومحدش عارف يتعامل معاه، ودايمًا اللاعب بيبقا عايز مدير فني، إمام عاشور عنده موهبة وبيصنع الفارق دايمًا.
وأتم تصريحاته: معتقدش إني هقبل العمل كـ مدرب عام مع مدير فني أجنبي “اسم كبير” في مصر، لكن لو بره مصر عادي.